കുട നന്നാക്കുന്ന ചോയി

എം. മുകുന്ദൻ എഴുതിയ ഒരു നോവലാണ് കുട നന്നാക്കുന്ന ചോയി. മാധ്യമം ആഴ്ചപ്പതിപ്പിൽ തുടർച്ചയായി ഈ നോവൽ പ്രസിദ്ധീകരിച്ചിരുന്നു. മയ്യഴിയിൽ നിന്ന് കപ്പൽ കയറി ഫ്രാൻസിലേക്ക് പോകുന്ന കുടപ്പണിക്കാരൻ ചോയി നാട്ടുകാരനും ചെറിയ കുട്ടിയുമായ മാധവന്റെ കയ്യിൽ ഒരു ലക്കോട്ട് ഏല്പിക്കുന്നു. തന്റെ മരണ ശേഷം മാത്രമേ അത് തുറക്കാവൂ എന്ന ആവശ്യപ്പെട്ടാണ് ചോയി ആ ലക്കോട്ട് മാധവനെ ഏല്പിക്കുന്നത്. നീ നല്ലവനാണെന്നും എനിക്ക് തന്നെ മാത്രമേ വിശ്വാസമുള്ളൂ എന്നും ലക്കോട്ട് നൽകുമ്പോൾ ചോയി മാധവനോട് പറയുന്നുണ്ട്.

കുട നന്നാക്കുന്ന ചോയി

കർത്താവ്	എം. മുകുന്ദൻ
രാജ്യം	ഇന്ത്യ
ഭാഷ	മലയാളം
മാധ്യമം	അച്ചടി
ISBN	978-81-264-7239-0

എന്താണ് ആ ലക്കോട്ടിൽ എന്നറിയാനുള്ള നാട്ടുകാരുടെ ഉദ്വേഗം മുകുന്ദൻ മനോഹരമായി സൃഷ്ടിച്ചിരിക്കുന്നു. ഈ പുസ്തകം പുതിയ രചനകളിൽ നല്ല ഒരു വായനാനുഭവം നൽകുന്ന ഒന്നായി നിരൂപകലോകം വിലയിരുത്തുന്നു.

പശ്ചാത്തലം

ഫ്രഞ്ച്കാർ മയ്യഴി വിട്ട്പോകുന്ന കാലം മുതലാണ് നോവലിലെ കഥ ആരംഭിക്കുന്നത്. ആ കാലങ്ങളിൽ വടക്കൻ കേരളത്തിൽ ധാരാളമായി ഉപയോഗിച്ചിരുന്ന വാക്കുകൾ ഈ നോവലിൽ കടന്നു വരുന്നുണ്ട്. ഒന്നിച്ചു മൂത്രമൊഴിക്കുന്നതിൽ രസം കണ്ടെത്തുന്ന രണ്ട് മതസ്ഥരായ രണ്ട് കൂട്ടുകാരുടെ ഒരു രംഗം നോവലിൽ വരുന്നുണ്ട്. അതു പോലെയുള്ള വ്യത്യസ്ത സന്ദർഭങ്ങളാൽ സമ്പന്നമാണ് നോവലിന്റെ ഇതിവൃത്തം. പോയ ആ കാലത്തിൽ നിന്നും ഇന്നത്തെ അസഹിഷ്ണുതയുടെ നവകാലവുമായി താരതമ്യം ചെയ്തു കൊണ്ടാണ് നോവൽ അവസാനിക്കുന്നത്. .

നിരൂപണം

പുതിയ കാലത്തോടുള്ള തന്റെ പ്രതിഷേധമാണ് തന്റെ രചന എന്ന് എം. മുകുന്ദൻ അവകാശപ്പെടുന്നു. എഴുത്തുകാരൻ പ്രതിഷേധിക്കേണ്ടത്, തന്റെ രചനകളിലൂടെയാണെന്ന് പ്രസ്താവിച്ച കഥാകാരനാണ് എം.മുകുന്ദൻ. കുട നന്നാക്കുന്ന ചോയി എന്ന കൃതിയിലൂടെ അദ്ദേഹമത് നിർവഹിച്ചിരിക്കുകയാണെന്ന് നിരൂപകർ വിലയിരുത്തുന്നു. സൗമ്യമായി മുന്നോട്ടു പോകുന്ന നോവൽ അതിന്റെ അവസാന നിമിഷങ്ങളിൽ വായനക്കാരെ ആകാംക്ഷയുടെ മുൾമുനയിലെത്തിക്കുന്നു.