നാഷണൽ അറ്റ്ലസ് ആൻഡ് തിമാറ്റിക് മാപ്പിങ് ഓർഗനൈസേഷൻ

കേന്ദ്ര ശാസ്ത്ര-സാങ്കേതിക വകുപ്പിന്റെ കീഴിൽ പ്രവർത്തിക്കുന്ന സർവേ ഒഫ് ഇന്ത്യയുടെ ഒരു ഉപഘടകം ആണ് നാഷണൽ അറ്റ്ലസ് ആൻഡ് തിമാറ്റിക് മാപ്പിങ് ഓർഗനൈസേഷൻ (നാറ്റ്മൊ). വിഭവ ഭൂപടങ്ങളും സാമൂഹ്യ-സാമ്പത്തിക വിവരങ്ങളും സമന്വയിപ്പിച്ച് ആസൂത്രണാവശ്യങ്ങൾക്ക് ഉപയുക്തമാവുന്ന രീതിയിൽ വിഷയാധിഷ്ഠിത ഭൂപടങ്ങൾ നിർമ്മിക്കുകയാണ് നാറ്റ്മൊയുടെ മുഖ്യധർമം.

ചരിത്രം

1956 ആഗസ്റ്റ് 18-ന് നാഷണൽ അറ്റ്ലസ് ഓർഗനൈസേഷൻ എന്ന പേരിൽ സ്ഥാപിക്കപ്പെട്ട ഈ സ്ഥാപനം 1978-ൽ നാഷണൽ അറ്റ്ലസ് ആൻഡ് തിമാറ്റിക് മാപ്പിങ് ഓർഗനൈസേഷൻ എന്നു പുനർനാമകരണം ചെയ്യപ്പെടുകയായിരുന്നു. പദ്മഭൂഷൺ പ്രൊഫ. എസ്.പി. ചാറ്റർജിയായിരുന്നു ഇതിന്റെ സ്ഥാപക ഡയറക്റ്റർ. കൊൽക്കത്തയിലെ ബിധാർ നഗർ ആസ്ഥാനമാക്കി പ്രവർത്തിക്കുന്ന നാറ്റ്മൊയ്ക്ക് കൊൽക്കത്തയിലും ഡൽഹിയിലുമായി 15 ഡിവിഷനുകളുണ്ട്.

ധർമ്മങ്ങൾ

ദേശീയ അറ്റ്ലസിന്റെ നിർമ്മാണമാണ് നാറ്റ്മൊയിലധിഷ്ഠിതമായ പ്രധാന ധർമമെങ്കിലും നാഷണൽ അറ്റ്ലസ് ഒഫ് ഇന്ത്യയുടെ സമാഹരണം, പ്രാദേശിക ഭാഷകളിലുള്ള അറ്റ്ലസ് നിർമ്മാണം, മറ്റു വിഷയാധിഷ്ഠിത ഭൂപടങ്ങളുടെ നിർമ്മാണം തുടങ്ങിയ ചുമതലകളും ഈ സ്ഥാപനം ഏറ്റെടുത്തു നടത്തുന്നുണ്ട്.

കടപ്പാട്: കേരള സർക്കാർ ഗ്നൂ സ്വതന്ത്ര പ്രസിദ്ധീകരണാനുമതി പ്രകാരം ഓൺലൈനിൽ പ്രസിദ്ധീകരിച്ച മലയാളം സർ‌വ്വവിജ്ഞാനകോശത്തിലെ നാഷണൽ അറ്റ്ലസ് ആൻഡ് തിമാറ്റിക് മാപ്പിങ് ഓർഗനൈസേഷൻ നാഷണൽ അറ്റ്ലസ് ആൻഡ് തിമാറ്റിക് മാപ്പിങ് ഓർഗനൈസേഷൻ എന്ന ലേഖനത്തിന്റെ ഉള്ളടക്കം ഈ ലേഖനത്തിൽ ഉപയോഗിക്കുന്നുണ്ട്. വിക്കിപീഡിയയിലേക്ക് പകർത്തിയതിന് ശേഷം പ്രസ്തുത ഉള്ളടക്കത്തിന് സാരമായ മാറ്റങ്ങൾ വന്നിട്ടുണ്ടാകാം.