മലയാളം: ഒരു പാത്രത്തിൽ വെള്ളം ഒഴിച്ച് ചൂടാക്കി ആവിയിൽ വേവിക്കുന്ന പലവിധ ഭക്ഷണങ്ങളും ഈ പാത്രത്തിൽ പാചകം ചെയ്യാറുണ്ടെങ്ങിലും സർവസാധാരണയായി ഇഡ്‌ലി ഉണ്ടാക്കുന്നതിനാൽ ഈ പാത്രത്തിന് ഇഡ്‌ലി പാത്രമെന്നാണ് പറയുന്നത്. ഇഡ്‌ലി മാവ് കുഴികളുള്ള തട്ടുകളിൽ ഒഴിച്ച് മൂടിക കൊണ്ട് മൂടിയാണ് വേവിക്കുന്നത്. നൂലപ്പം (ഇടിയപ്പം, നൂൽപുട്ട്), കൊഴിക്കൊട്ട, പിടി പോലെയുള്ള മറ്റുചില പലഹാരങ്ങളൂം ഇതേ തട്ടിൽ വെച്ച് ആവി കയറ്റി വേവിക്കാറുണ്ട്. ഏത്തപ്പഴം (നേന്ത്രപഴം) പുഴുങ്ങുന്നതിനും പച്ചക്കറികൾ ആവി കയറ്റി വേവിച്ച് കഴിക്കുന്നതിനും ചെറിയ സുഷിരങ്ങളുള്ള തട്ടാണ് ഉപയോഗിക്കുന്നത്. സൗകര്യം കണക്കിലെടുത്ത്, വട്ടയപ്പത്തിനുള്ള മാവ് കുഴികൾ ഉള്ള തട്ടിലൊഴിച്ച് വട്ടയപ്പവും (വട്ടയപ്പം വട്ടത്തിലായിരിക്കും പക്ഷേ ഇവിടെ ഇഡ്‌ലിയുടെ ആകൃതിയിൽ) ഉണ്ടാക്കാറുണ്ട്.

ഭക്ഷണത്തിൽ അധികം എണ്ണ ഉപയോഗിക്കുന്നത് ആരോഗ്യപ്രശ്നങ്ങൾ ഉണ്ടാക്കുന്നതിനാൽ, ആവി കയറ്റിയുണ്ടാക്കാവുന്ന ഭക്ഷണങ്ങളുടെ ഉപയോഗം വർദ്ധിച്ചുവരുന്നുണ്ട്.

ഇവിടെ ചേർത്തിരിക്കുന്ന ഇഡ്‌ലി പാത്രം രണ്ട് നിലകളായിട്ടുള്ളതാണ്. അടിയിലെ തട്ടിൽ വെള്ളം ഒഴിക്കുന്നു നിറയെ സുഷിരങ്ങളുള്ള മുകളിലെ പാത്രത്തിൽ ഓരോ തട്ടുകൾ വെയ്ക്കുന്നു. ആവി പുറത്തേക്ക് പോകാതെയിരിക്കാൻ മൂടിക വെച്ച് അടയ്ക്കുന്നു. വിപണിയിൽ ഒരു പാത്രം മാത്രമുള്ളതും ലഭ്യമാണ്. ആദ്യകാലങ്ങളിൽ ചെമ്പ് എന്ന ലോഹം കൊണ്ട് ഉണ്ടാക്കിയിരുന്നതുകൊണ്ടാകാം, ഇഡ്‌ലി ചെമ്പ് എന്നും പറയുന്നത്.

--- ദക്ഷിണ ഭാരതത്തിലെ ഒരു ഭക്ഷണ വസ്തുവാണ് ഇഡ്‍ലി (ഇഡ്ഡലി (ഇഡലി, ഇഡ്ഡ്‍ലി). അരിയും ഉഴുന്നും കുതിർത്തരച്ച മാവ് പുളിപ്പിച്ചശേഷം ആവിയിൽ വേവിച്ചുണ്ടാക്കുന്ന വെളുത്ത നിറത്തിലുള്ള മൃദുവായ ഒരു പലഹാരമാണിത്. ഇവിടെ ചേർത്തിരിക്കുന്ന പാത്രമാണ് ഇഡ്‌ലി ഉണ്ടാക്കുന്നതിനായി ഉപയോഗിക്കുന്നത്.

മലേഷ്യ, സിംഗപ്പൂർ, ശ്രീലങ്ക, ബർമ്മ തുടങ്ങിയ രാജ്യങ്ങളിലും ഇത് വ്യാപകമായി ഭക്ഷിച്ചൂവരുന്നു. ഗാർഹികമായി മാത്രം ഉണ്ടാക്കാറുണ്ടായിരുന്ന ഇഡ്‍ലി ഇന്ന് വ്യാവസായികാടിസ്ഥാനത്തിലും നിർമ്മിച്ചുവരുന്നു. ഇഡ്‌ലി മാവും വ്യാവസായികാടിസ്ഥാനത്തിൽ ലഭ്യമാണ്.

ആദ്യകാലങ്ങളിൽ പ്രാതലായാണ് ഇഡ്‍ലി കഴിച്ചിരുന്നതെങ്ങിലും ഇപ്പോൾ ഏത് സമയത്തും കഴിക്കുന്നത് കാണുന്നുണ്ട്. ചട്നിയും സാമ്പാറുമാണ്‌ ഇഡലിയോടൊപ്പം കഴിക്കുന്ന ചില പ്രധാനകറികൾ. ചെറുതായി ഉതിർത്ത ഇഡലിയിൽ മുളകുപൊടി വിതറി കറിവേപ്പിലയും ചേർത്ത് ചൂടാക്കിയും കഴിക്കാറുണ്ട്.