നോർത്തേൺ കാർഡിനൽ

വടക്കേ അമേരിക്കൻ വൻ‌കരയിൽ കാണപ്പെടുന്ന ഒരു പക്ഷിയാണ് നോർത്തേൺ കാർഡിനൽ. റോമൻ കത്തോലിക്കാ സഭയിലെ കർദ്ദിനാൾമാരുടെ ചുവന്ന മേൽക്കുപ്പായത്തിന്റെ നിറമുള്ളതിനാലാണ് ഈ പേരു ലഭിച്ചത്. "റെഡ് ബേർഡ്" "വിർജീനിയ നൈറ്റിംഗേൽ" എന്നിങ്ങനെയും അറിയപ്പെടുന്നു. അഴകാർന്ന ചുവപ്പു നിറത്തിലുള്ള ഈ കിളികൾ ഒരു കാലത്ത് അമേരിക്കയിൽ വ്യാപകമായി കൂട്ടിലടച്ച് വളർത്തപ്പെട്ടിരുന്നെങ്കിലും 1918ലെ പ്രത്യേക നിയമപ്രകാരം ഇതു നിരോധിച്ചു.

നോർത്തേൺ കാർഡിനൽ Northern Cardinal
ആൺകിളി, അമേരിക്കയിലെ ഒഹിയോയിൽ നിന്നും
പെൺകിളി, അധികം വർണ്ണാഭയില്ലാതെ
പരിപാലന സ്ഥിതി
ഒട്ടും ആശങ്കാജനകമല്ല  (IUCN 3.1)
ശാസ്ത്രീയ വർഗ്ഗീകരണം
കിങ്ഡം:	Animalia
Phylum:	Chordata
Class:	Aves
Order:	Passeriformes
Family:	Cardinalidae
Genus:	Cardinalis
Species:	C. cardinalis
Binomial name
Cardinalis cardinalis (Linnaeus, 1758)

രൂപം

ഏകദേശം 9 ഇഞ്ച് നീളമുള്ള നോർത്തേൺ കാർഡിനൽ ഒരു പാടുംകിളിയാണ്. ആൺകിളികൾക്ക് ആകർഷകമായ ചുവപ്പു നിറമുണ്ട്. രൂപത്തിൽ സമാനമാണെങ്കിലും അത്ര മനോഹരമല്ലാത്ത ഇളം തവിട്ടു നിറമാണ് പെൺകിളികളുടേത്. ആൺകിളികളുടെ ചുവന്ന കൊക്കിനു ചുറ്റും കറുപ്പുനിറമാണുള്ളതെങ്കിൽ പെൺകിളികൾക്ക് ഈ ഭാഗം ചാരനിറമായിരിക്കും. രണ്ടു കിളികൾക്കും തലയിൽ നീണ്ടതൊപ്പിപോലെ ഏതാനും രോമങ്ങൾ നീണ്ടുനിൽക്കും. കിളിക്കുഞ്ഞുങ്ങൾക്ക് പെൺ‌ കാർഡിനലിന്റെ നിറമാണ്.

ആവാസം

അമേരിക്കയുടെ കിഴക്ക്, തെക്ക് ഭാഗങ്ങളിലാണ് കാർഡിനലുകൾ ധാരാളമായി കാണപ്പെടുന്നത്. കാനഡയുടെ തെക്കുകിഴക്ക് പ്രദേശങ്ങളിലും മെക്സിക്കോ, ഗോട്ടിമാല, ബെലീസ് എന്നീ രാജ്യങ്ങളിലും ഈ പക്ഷികളുണ്ട്. ചെറുകാടുകളും, ഗ്രാമപ്രദേശങ്ങളിലെ കുറ്റിക്കാടുകളുമാണ് ഈ പക്ഷികളുടെ ആവാസ കേന്ദ്രങ്ങൾ. സാധാരണ നിലയിൽ ഇവ ദേശാടനം ചെയ്യാറില്ല. പ്രതികൂലമായ കാലാവസ്ഥയോ ഭക്ഷ്യ ക്ഷാമമോ ഉണ്ടെങ്കിൽ മാത്രം വാസസ്ഥലം മാറ്റാറുണ്ട്. പതിനഞ്ചു വർഷം വരെ ആയുസുണ്ട് ഈ കിളികൾക്ക്.

പ്രത്യേകതകൾ

പെൺ‌കിളി

അമേരിക്കയിലെ നോർത്ത് കരോളിന, വെസ്റ്റ് വെർജീനിയ, ഒഹായോ, ഇല്ലിനോയി, ഇന്ത്യാന, കെന്റക്കി, വിർജീനിയ എന്നീ സംസ്ഥാനങ്ങളുടെ ദേശീയ പക്ഷിയാണ് നോർത്തേൺ കാർഡിനൽ. അമേരിക്കയിൽ പ്രത്യേക നിയമപ്രകാരം ഈ കിളികളെ വേട്ടയാടുന്നതും കൂട്ടിലടയ്ക്കുന്നതും വിൽക്കുന്നതും നിരോധിച്ചിട്ടുണ്ട്.