അൻഹൈഡ്രൈഡ്

ജലത്തോടു രാസപരമായി യോജിച്ച് അമ്ലമോ ക്ഷാരമോ ലഭ്യമാക്കുന്ന, അല്ലെങ്കിൽ അമ്ലത്തിൽനിന്നോ ക്ഷാരത്തിൽനിന്നോ ജലാംശം നീക്കി ലഭ്യമാകുന്ന ഓക്സൈഡാണ് അൻഹൈഡ്രൈഡ്. ജലത്തോടു യോജിച്ച് അമ്ലം ഉത്പാദിപ്പിക്കുന്ന ഓക്സൈഡ് ആസിഡ് അൻഹൈഡ്രൈഡ് ആണ്. ഉദാഹരണം, സൾഫർ ട്രൈഓക്സൈഡ്, ക്ലോറസ് ഓക്സൈഡ് മുതലായവ.

സൾഫ്യൂറിക് അമ്ലം

SO₃ + H₂O → H₂SO₄

ഹൈപൊ ക്ലോറസ് അമ്ലം

Cl₂O + H₂O → 2 HClO

അമ്ലത്തിൽനിന്ന് ജലമോ ജലമൂലകങ്ങളോ നീക്കംചെയ്താൽ അൻഹൈഡ്രൈഡ് തിരിച്ചുകിട്ടും.

ജലത്തോടു യോജിച്ചു ക്ഷാരം ഉത്പാദിപ്പിക്കുന്ന ഓക്സൈഡിന് ബേസിക് അൻഹൈഡ്രൈഡ് എന്നു പറയുന്നു. ഉദാഹരണം സോഡിയം ഓക്സൈഡ്, കാൽസിയം ഓക്സൈഡ് മുതലായവ.

Na₂O+ H₂O → 2 NaOH
CaO + H₂O → Ca(OH)₂

ക്ഷാരത്തിൽനിന്ന് ജലമോ ജലമൂലകങ്ങളോ നീക്കംചെയ്താൽ അൻഹൈഡ്രൈഡ് തിരിച്ചുകിട്ടും. കാർബണിക അമ്ലങ്ങളുടെ അൻഹൈഡ്രൈഡ് ലഭിക്കുവാൻ ചിലവിധികൾകൊണ്ട് അവയിലെ ജലമൂലകങ്ങളെ നീക്കംചെയ്താൽ മതി. അസറ്റിക് അമ്ലത്തിൽനിന്ന് അസറ്റിക് അൻഹൈഡ്രൈഡിന്റെ ഉത്പാദനം ഒരു ഉദാഹരണമാണ്.

പുറംകണ്ണികൾ തിരുത്തുക

കടപ്പാട്: കേരള സർക്കാർ ഗ്നൂ സ്വതന്ത്ര പ്രസിദ്ധീകരണാനുമതി പ്രകാരം ഓൺലൈനിൽ പ്രസിദ്ധീകരിച്ച മലയാളം സർ‌വ്വവിജ്ഞാനകോശത്തിലെ അൻഹൈഡ്രൈഡ് എന്ന ലേഖനത്തിന്റെ ഉള്ളടക്കം ഈ ലേഖനത്തിൽ ഉപയോഗിക്കുന്നുണ്ട്. വിക്കിപീഡിയയിലേക്ക് പകർത്തിയതിന് ശേഷം പ്രസ്തുത ഉള്ളടക്കത്തിന് സാരമായ മാറ്റങ്ങൾ വന്നിട്ടുണ്ടാകാം.